Dende 1997, cada 24 de outubro conmemórase o Día da Biblioteca, unha iniciativa da Amigos del libro infantil y juvenil , co apoio do Ministerio de Cultura, en lembranza da destrución da Biblioteca de Sarajevo incendiada en 1992 durante a Guerra dos Balcáns.
Esta conmemoración naceu para trasladar á opinión pública a importancia da biblioteca como lugar de encontro de todos os lectores de todas as idades coa cultura, e como un instrumento de mellora da formación e a convivencia humana.
Cada ano se encarga a un escritor e a un ilustrador, ambos de recoñecido prestixio, a redación do pregón e o deseño do cartel que se difunde entre todas as bibliotecas de España, asociados e interesados.
Este ano as elexidas foron dúas mulleres: Ledicia Costas, última gañadora do Premio Nacional (Escarlatina, a cociñeira defunta) e do Premio Lazarillo (Jules Verne e a vida secreta das mulleres planta), e a ilustradora Elena Odriozola, tamén galardonada co Premio Nacional de Ilustración en 2015.
Para conmemorar o Día da Biblioteca desde o Colectivo Lemos Le organizamos por cuarto ano unha xuntanza de confraternidade para todos os sectores relacionados coa cultura, a lectura e a educación.
O xantar celebrarase o día 22 de outubro na Casa Grande de Rosende. As persoas interesadas en asistir poderán recoller a súa entrada nas Bibliotecas Públicas Municipais de A Pobra do Brollón, Bóveda, Saviñao, Sober ou na biblioteca escolar do CEIP A Gándara de Monforte de Lemos; tamén no propio restaurante ata o día 17 de outubro incluído a un prezo de 25 €.
Con este acto queremos reivindicar a importancia do papel das Bibliotecas como difusoras de cultura, formadoras de lectores, lugar de encontro e centros de información e recursos.
Durante a mesma farase entrega dos premios do III Certame de Divulgación Mulleres de Lemos: Lola de Penelas. Unha muller oleira.
Ademais convocarase oficialmente a IV Edición do Certame de Divulgación Mulleres de Lemos.
Comentarios
Publicar un comentario